Hari Minggu, hari libur, hari untuk keluarga. Karena itu, Obet deng Bapa, Mama, Tete, Nenek mo pi Pantai Lampu Satu.
Sementara siap-siap, Mama tanya sama Obet: “Obet, Bapa, Mama, Tete, Nenek dan ko sendiri mo pi pantai. Kalau masing-masing minum satu botol Coca-cola, berapa botol kitorang mesti bawa?”
Obet – sambil hitung-hitung deng de pu jari: “Empat!”
Mama: “Hei… coba ko hitung ulang, Bapa, Mama, Tete, Nenek, dan ko sendiri pigi pantai. Kalau masing-masing minum satu botol Coca-cola, berapa botol mesti dibawa?”
Obet – sambil hitung-hitung deng jari: “Empat!”
Mama: “Hoi, sapa ko pu guru matematika ini? Hitung ulang! Bapa, Mama, Tete, Nenek, dan ko (sambil tepuk-tepuk Obet pu kepala) mo pi pantai. Masing-masing minum satu botol Coca-cola. Jadi berapa kitorang mesti bawa?”
Obet: “Empat!”
Mama: “Ah, bagaimana ko hitung itu?”
Obet: “Mama…. sa tra mau coca-cola. Sa mau Fanta!”
